எது எடுக்கப்பட்டதோ அது இங்கிருந்தே எடுக்கப்பட்டது

தீச்சொல்  பேசிய 

குழந்தையை மிரட்டி 

கண்டித்து 

அடித்தும் 

அடங்காத கோபத்தில் 

தவறி 

வந்து விழுகிறது 

அதே

 தீச்சொல்!

ஏனோ?

கதிர் கொறிக்கும் 

காக்கை விரட்ட 

சட்டை பேன்டில் 

சோளக்கொல்லை  பொம்மை-

காய்த்து சிவந்த கரங்களுடன் 

மடை திறந்து 

களை பறித்து 

காவல் காக்கும் அப்பனுக்கு 

கோவணம்!

சன்னலினூடே ஒரு பயணம்

புளிமூட்டையென ஜனத்திரளினுள் நுழைந்து

அடித்துப் பிடித்து

சன்னலோர இருக்கையில் அமர்கையில்

திடுக்கிட வைத்தது அந்த ‘படீர்’ சப்தம்-

எட்டு வயது சிறுவனொருவன்

தன் கையே தனக்குதவி என

முதுகில் அடித்துக் கொண்டு

பிச்சை கேட்கிறான்

விட்டெறியும் காசு

‘ஜல்’ என்று தரையில் விழ

அவன் ‘படீர்’ சுதி சேர்கிறான்

என்ன கொடுமை இது

இதை எல்லாம்

முழுமையாக காணக்கூடாது என்றுதான்

சன்னலுக்கு கம்பிகள் வைத்தனரோ?

என்று எண்ணத்தில் தோன்ற 

“குழந்தை தொழிலாளர் முறையை  ஒழிப்போம்” என்ற

போஸ்டரை தாண்டி வேகமெடுக்கிறது பேருந்து!

இதை ஒழிப்பது எங்ஙனமோ என்ற

ஏக்கத்துடன்

சாலையோர புளிய மரங்களும்

என் நினைவுகளும்

அவனை நோக்கி ஓட

எதிர் திசையில் தொடர்கிறது பயணம்!

கனவாகவும் இருக்கலாம்

தனித்த இரவுகளில் 

நீடித்த சிந்தனைகளில் 

எடுத்திட்ட முடிவுகள் 

திட்டமிட்டு 

திருத்தி அமைத்து 

செயல்படுத்திட 

வெற்றியின் விளிம்பில் 

விழிப்பு !

கண்ணாடி

தூசு படிந்த 

கண்ணாடியைத்

துடைக்க துடைக்க 

மெருகேறும் -

முகம்!

சிரிக்கும் போதும் 

கோபப்படும் போதும் 

மற்றவர்கள் கவனிக்கும் போதும் 

மனப்பிரமைக்குள் 

அழகாக நான் -

கண்ணாடி பார்க்கும்வரை!

அடக்கம்

என்னதான் 

வானையே அளந்தாலும் 

தன் சிறகுகளை 

சுருக்கி தான் வைத்துக்கொள்கிறது 

சிட்டுக்குருவி !

வினோதம்

என்னதான் படித்திருந்தாலும் 

கைநாட்டு 

வைத்தால் தான் 

வருகையை பதிய முடிகிறது 

எங்கள் அலுவலகத்தில் -

பயோ மெட்ரிக் எந்திரம்!